પોતાના જીવનનો એણે કદીય વિચાર ન કર્યો
આર્થર કમાવાની કોઈ પ્રવૃત્તિ કરતો નથી. એણે લગ્ન કર્યા છે અને એને એક દીકરો પણ છે. તેમ છતાં પોતાના નિર્વાહની કોઈ ચિંતા નથી કારણ કે બહેન કેથી એના માટે અમેરિકામાં વૈતરું કરે છે અને પૈસા મોકલે છે. મંગાવે એટલા પૈસા કેથી મોકલે છે. મેં પૂછ્યું ‘તારો ભાઈ આટલો ઉડાઉ અને બેજવાબદાર કેમ છે?’
કેથી બોલી, ‘મારા ફાધરને કેન્સરનું નિદાન થયું ત્યારે તેઓ માંડ ત્રીસ વર્ષના હતા. સંતાનમાં હું એક દીકરી હતી તેથી તેઓ વલોપાત કરતા હતા કે હું મરીશ પછી મારું નામ પણ ભૂંસાઈ જશે. મારી મા કહે આ દીકરીને હું ભણાવીગણાવીને હોશિયાર બનાવીશ. તો તેમણે કહ્યું, એ મારું નામ આગળ તો નહીં ચલાવી શકે ને! હું મારા બાપનો એકનો એક દીકરો છું, પણ હવે મારા પછી કોઈ નહીં.
મારા ફાધરને દીકરાની તીવ્ર ઇચ્છા એટલે ડોક્ટરને પૂછીને એમણે બાળક માટે પ્લાન કર્યું અને મારા ભાઈનો જન્મ થયો. જો કે ભાઈના જન્મ પહેલાં મારા ફાધરનું અવસાન થયું હતું. ફાધર દીકરા માટે તડપતા હતા, પણ દીકરાનું મોં જોઈ શક્યા નહોતા.
મારી મા ભાઈને રાજકુંવરની જેમ લાડ લડાવે. એની ભૂલ હોય તો પણ કદી ટોકે નહીં. મારી માના લાડે ભાઈને સ્વાર્થી, બેજવાબદાર અને સ્વમાન વગરનો બનાવ્યો. ભાઈએ એનો અભ્યાસ પૂરો કર્યો નહીં અને રખડી ખાધું. અત્યારે ક્યાંય એને નોકરી નથી અને ખર્ચા તો બેસુમાર છે. આર્થર લાગણીહીન અને બુદ્ધિ વગરનો છે. આ જોઈને મારી માને ભાઈની બહુ ચિંતા થવા માંડી, પણ એને ઠપકો આપે નહીં. આપણે જો ઠપકો આપવા જઈએ તો તરત ભાઈનો પક્ષ લે કે બિચારો નાનો છે, બિચારાએ બાપનું મોંય જોયું નથી.
ભાઈને તો ફાવતું જડતું હતું, પણ પછી ભાઈની ચિંતામાં ને ચિંતામાં મા ઓગળતી ગઈ અને પોતાનો અંત નજીક જોઈને એણે મારી પાસેથી વચન લીધું કે ભાઈને સાચવજે. તારા પપ્પા અને મારી કેટકેટલી પ્રાર્થના પછી એ આપણને મળ્યો છે. એને કોઈ તકલીફ ન પડે તે જોજે.
મારી મા અતશિય વિશ્વાસુ, પ્રેમાળ અને સરળ હતી. એ આર્થરના જૂઠ્ઠાણાને પકડી શકતી નહીં અને મરતી માને દુ:ખ ન પહોંચે એ ખ્યાલે હું માને વાત કરતી નહીં. માની માંદગીના ખર્ચ અને ભાઈની ઉડાઉગીરીને પહોંચી વળવા હું અમેરિકા આવી.’ મેં પૂછ્યું, ‘આર્થર તારાથી નાનો છે અને પરણી ગયો છે. તું ક્યારે પરણીશ?’
‘હું પરણું તો આર્થર અને એના ફેમિલીનું શું થાય? આર્થરનો દીકરો મારા ફાધરનો વંશવેલો આગળ વધારશે. મારો વિચાર છે કે એને ખૂબ સારી રીતે ભણાવું. મારી ભાભી ખૂબ શોખીન છે અને ભાઈ એના શોખ પૂરા ન કરે તો ઘરમાં ઝઘડા થાય. પેલો નાનો દીકરો ગભરાય અને અસલામતી અનુભવે. ભાભી તો અવારનવાર ધમકી આપે છે કે હું તો આ ઘર, તને અને તારા દીકરાને છોડીને જતી રહીશ. એટલે હું પૈસા મોકલું છું.’
‘કેથી, આનો તો કદી અંત નહીં આવે, આર્થર સુધરે એવાં પગલાં લે. તું કડક બન.’ ‘હું કડક બનું એટલે કે એ માગે એટલા પૈસા ન મોકલું તો મારી ભાભી એને છોડીને જતી રહે તો? મારો ભાઈ ડિપ્રેશનમાં સરી પડે અને ભત્રીજો રખડી પડે. મારા ફાધરનું સ્વપ્નું રોળાઈ જાય, મારી માની તપશ્વર્યા એળે જાય. આ બધું ન બને તે માટે હું પોતે સંસારસુખની કામના નથી રાખતી.
મારી મહેનતથી, ત્યાગથી મારા માબાપની મહેચ્છા ફળે છે એનો મને સંતોષ છે. મારી એક જ મહત્વાકાંક્ષા છે કે મારા બાપનો વંશવેલો આગળ વધે.’ લાગણીભર્યા સૂરે કેથી બોલી.
No comments:
Post a Comment